అసమర్ధుని ఆక్రోశం (పద్య కవిత)

ఏట్టెట్టా !! నువ్వేనా??
ఇట్టా వస్తావనుకొను ఎదురుగ చూస్తే
అట్టే చాటుగ పోతివి
పుట్టేమి మునిగె కనపడివుంటే మాకూ

చుట్టానివి కావని మే
మెట్టాగనుకొందుమయ్య మేమేగాదా
ఇట్టా ఈగుడిలోనే
నిట్టగనిలబెట్టినాము నిన్నే ఎపుడో

అట్టిట్టూ చూడవుగద
చుట్టూ జరిగేది చూచు చూపేలేదా
మట్టా మసానమా? ఏ
మట్టా పలుకాడకుండ మనగలవయ్యా?

తిట్టిన, అరచిన, చివరకు
కొట్టిన కూడా బదులాడకుండినచో, ఇం
కెట్టా వేగుట? ఔరా
అట్టే వుంటావ విగ్రహంగా ఎపుడూ

ఒట్టింకెప్పుడునేనిను
కొట్టను, దూషించనయ్య కోపించకుమా!
అట్టుడికిపోయె దేశము
వుట్టినె నిల్చుండుటేల ఒకపరి రావా??