| ఆమె: | లేవరేమి చాలలేటయ్యెనీపొద్దు |
| అతడు: | అబ్బ! ఎందుకట్లు అరతువీవు? |
| ఆమె: | బాగు! నాది అరుప? బారెడు పొద్దాయె |
| అతడు: | బద్దకంబు తీరవలదెనాకు |
| ఆమె: | పదికి ముందె మీరు పక్కెక్కినారుగ |
| అతడు: | అబ్బ! లేచుచుంటి అరవింక |
| ఆమె: | పళ్ళుతోముకొనగ బాత్రూముకెళ్ళుడు |
| అతడు: | బెడ్డు కాఫి తెమ్ము వేగముగను |
| ఆమె: | పాచిముఖముతోన? పాచిక పారదు |
| అతడు: | చాలు చాలు నాకు చావు వచ్చె |
| ఆమె: | మంచి చెప్ప చావు మాటేల నిప్పుడు |
| అతడు: | నాదె తప్పు యింక నన్ను వదలు |
| ఆమె: | వచ్చినార? ఇదిగొ బ్రహ్మాండమౌ కాఫి |
| అతడు: | అబ్బ! నోరు కాలె ఆర్చి యిమ్ము |
| ఆమె: | ఆర్చుకొనుడుమీరు అదికూడ రాదేమి |
| అతడు: | నిన్ను సాయమడుగ నెపము నాది |
| ఆమె: | వంటలోకి నేడు వండునదేమిటో |
| అతడు: | వేళకింత పెట్టు తాళలేను |
| ఆమె: | లేటు చేసినాన? ఏటికిట్లందురు? |
| అతడు: | సర్లె వండుమేదొ సర్దుకొందు |
| ఆమె: | కూరలింటలేవు కొనితెండు వేగాన |
| అతడు: | ఊరగాయలేద? కూరలేల? |
| ఆమె: | సాకులేల ఇదిగొ సంచి మనీపర్సు |
| అతడు: | సర్లె పోయి వత్తు చంపబోకు |
| ఆమె: | సంచిలోన సరకు సగమైన లేదేమి |
| అతడు: | ధరలు మండుచుండె సరకులంతె |
| ఆమె: | వంట అయినదింక వడ్డించెదను రండు |
| అతడు: | కర్రి ఏలయిట్లు కరకరమనె |
| ఆమె: | బెండ ముదురుగనుక వండినా యిట్లాయె |
| అతడు: | ఏమడిగిన తప్పు లెంతువుగద |
| ఆమె: | తిండి సరిగ మీరు తినలేదు పాపము |
| అతడు: | వేళమించుచుండెవెళ్ళుచుంటి |
| ఆమె: | మధ్యవేళ టిఫిను మరువకుండ తినుడు |
| అతడు: | మాడవలదు నీవు కూడ తినుము |
| ఆమె: | ఇంటి కొచ్చునపుడు ఈసరుకులు తెండు |
| అతడు: | ఈవినింగు రమ్ము నీవుకూడ |
| ఆమె: | సరుకులను కొనుటకు సరదాగ వత్తును |
| అతడు : | వంట చేయవలదు ఇంటిలోన |
| ఆమె: | ఫైవుస్టారు హొటల? వద్దండి దండుగ |
| అతడు: | ఖర్చుగూర్చి నీవు కవలపడవలదు |
| ఆమె: | ఆర్డరిచ్చినారు అన్నితినగలమా? |
| అతడు: | ముందు రుచినిచూడు తొందరేల |
| ఆమె: | అబ్బొ! కడుపునిండె ఆయాస మొచ్చెను |
| అతడు: | తిను హిమక్రిమిదియె తీయగుండు |
| ఆమె: | చల్లగాలి ఎంతొ చక్కగా యుండెనో |
| అతడు: | బీచి వడ్డు గనుక వీచె గాలి |
| ఆమె: | ఎంతప్రేమమీకు ఇవ్విది నాపైన |
| అతడు: | కలనుగూడ నిన్నె కలవరింతు |
| ఆమె: | నిదురపోయినార? నేను వచ్చితి లెండు |
| అతడు: | నిదుర వచ్చుచుండె నిజము వినుము |
| ఆమె: | మంచిచెడ్డలసలు మాట్లాడరా ఏమి? |
| అతడు: | గుర్రు గుర్రు గుర్రు! గుర్రు గుర్రు!! |
No comments:
Post a Comment